Прафсаюзны патрыятычны марафон «Дарогамі роднай зямлі» праходзіць у Магілёўскай вобласці. Мерапрыемства прымеркавана да Года гістарычнай памяці, расказаў старшыня Магілёўскай абласной арганізацыі прафсаюза работнікаў мясцовай прамысловасці і камунальна-бытавых прадпрыемстваў Павел Жуйкоў.

«Ідэя марафону заключаецца ў тым, што першасныя прафсаюзныя арганізацыі адпраўляюцца ў турысцка-экскурсійныя паездкі па Беларусі, падчас якіх наведваюць знакавыя аб'екты гістарычнай і культурнай спадчыны краіны, – адзначыў Павел Жуйкоў. – З пачатку года ўжо адбылося больш за 20 такіх паездак, у агульнай складанасці іх будзе арганізавана больш за 50. Падчас марафону работнікі нашых прадпрыемстваў ля абеліскаў і мемарыялаў аддаюць даніну памяці і павагі загінуўшым у гады Вялікай Айчыннай вайны, успамінаюць аб мужнасці, стойкасці і гераізме нашых продкаў, якія паклалі жыццё на алтар свабоды і незалежнасці Беларусі, знаёмяцца з аб'ектамі нашай унікальнай архітэктурнай спадчыны, любуюцца прыгажосцю прыроды беларускіх паркаў і запаведнікаў».

Па словах прафсаюзнага лідара, сэнс марафону ў тым, каб працаўнік не толькі наведаў знакавае месца, але і па вяртанні дадому падзяліўся сваімі ўражаннямі ад паездкі са сваімі калегамі, роднымі і блізкімі. «Каб не страціць нашы каштоўнасныя і цывілізацыйныя арыенціры, у Год гістарычнай памяці выключна важна, каб як мага больш жыхароў краіны звярнуліся да вытокаў беларускай дзяржаўнасці, айчыннай гісторыі і культуры, якія складаюць аснову развіцця сучаснай Беларусі», – сказаў на заканчэнне Павел Жуйкоў.

У Год гістарычнай памяці абласная арганізацыя галіновага прафсаюза запланавала правядзенне маладзёжнай акцыі «Традыцыі папярэднікаў беражліва захоўваючы» з уручэннем членскіх прафсаюзных білетаў навучэнцам Бабруйскага дзяржаўнага тэхналагічнага каледжа, а таксама конкурсу дзіцячага малюнка «Гісторыя маёй Радзімы» сярод дзяцей членаў прафсаюза.

БЕЛТА