Рэспубліканскія спаборніцтвы па танцавальным спорце «Вясновы баль 2022» пройдуць у Магілёве 17 красавіка. Такая інфармацыя размешчана на сайце Беларускага альянсу танцавальнага спорту.
Спаборніцтвы пройдуць у спарткомплексе «Алімпіец», дзе танцавальныя пары і сольныя выканаўцы будуць змагацца за месца на самай высокай прыступцы п’едэстала гонару.
«У ранішнім і дзённым аддзяленнях пройдуць спаборніцтвы танцавальных пар у розных класавых групах, а таксама выступленні прадстаўнікоў катэгорыі «Артыстычны танцавальны спорт». Выйдуць на паркет і маладыя танцоры», – расказалі арганізатары.
У дзённым і вячэрнім аддзяленнях пройдуць спаборніцтвы танцавальных пар больш высокіх класаў. Арганізатары спаборніцтваў абяцаюць удзельнікам яркую атмасферу свята і шмат прыемных сюрпрызаў.
Стартуе танцавальны турнір а 10.00, дзённае аддзяленне пачынаецца а 14.00, вячэрні блок выступленняў стартуе а 17.00.
Арганізатарамі спаборніцтваў выступаюць Міністэрства спорту і турызму, РГА «Беларускі альянс танцавальнага спорту», Нацыянальны алімпійскі камітэт і танцавальна-спартыўны клуб «Лідар».