Сёння мы знаходзімся на парозе найважнейшай грамадска-палітычнай падзеі. 27 лютага 2022 года адбудзецца рэспубліканскі рэферэндум па ўнясенні змен і дапаўненняў у Канстытуцыю Рэспублікі Беларусь. Цяпер, па 26 лютага, выбаршчыкі маюць права аддаць свой голас за будучыню краіны датэрмінова.
Дзякуючы дзеючай Канстытуцыі ў Рэспубліцы Беларусь створана сацыяльна арыентаваная дзяржава. Змяненні і дапаўненні ў Асноўны закон нашай краіны прадыктаваны часам, яны неабходны для таго, каб мы і нашы дзеці жылі ў мірнай, незалежнай краіне, стваралі ў імя яе дабро і ўласны дабрабыт.
У праекце абноўленай Канстытуцыі знайшлі адлюстраванне ключавыя моманты ўсіх сфер жыццядзейнасці сучаснага беларускага грамадства: забеспячэнне правоў чалавека, захаванне гістарычнай памяці, рэалізацыя асноўных напрамкаў сацыяльнай палітыкі, умацаванне традыцыйных сямейных каштоўнасцяў, усебаковае развіццё моладзі, пераразмеркаванне паўнамоцтваў паміж рознымі органамі дзяржаўнай улады і шматлікае іншае. Пры гэтым прыярытэтам нашай дзяржаўнай палітыкі быў і застаецца чалавек і ягоны дабрабыт.
Абноўленая Канстытуцыя - гэта дакумент, звернуты ў будучыню, створаны пры непасрэдным удзеле і волі народа. Жыхары Магілёўскага раёна прынялі актыўны ўдзел у абмеркаванні Праекта змен і дадаткаў Канстытуцыі Рэспублікі Беларусь. Гэта азначае, што нам неабыякавы лёс роднай краіны. Мы, беларускі народ, самі вызначаем сваю будучыню і гэтым даказваем, што менавіта мы, а не ціск звонку, санкцыі, будзем вырашаць далейшы лёс Беларусі. Толькі ўсенародна, аб'яднаўшы нашы намаганні, мы зможам вызначыць правільны шлях далейшага развіцця дзяржавы, захаваць яе незалежнасць і суверэнітэт, каб з упэўненасцю глядзець у будучыню.
Перакананы, што кожны з жыхароў Магілёўскага раёна, прыйшоўшы на рэферэндум, у чарговы раз праявіць сваю мудрасць, прынцыповую грамадзянскую пазіцыю, цвёрдасць перакананняў і жаданне заставацца гаспадаром на сваёй зямлі. Вызначым будучыню нашай краіны разам!
А.І. Чыкіда, старшыня Магілёўскага раённага выканаўчага камітэта.
С.Д. Ярошчанка, старшыня Магілёўскага раённага Савета дэпутатаў.