У рамках усенароднага абмеркавання праекта змяненняў і дапаўненняў Канстытуцыі Рэспублікі Беларусь адбыліся сустрэчы старшыні Магілёўскага раённага Савета дэпутатаў Сяргея Ярошчанкі з жыхарамі населеных пунктаў, размешчаных на тэрыторыі Буйніцкага і Заводскаслабадскога сельскіх Саветаў.
У мерапрыемствах прынялі ўдзел старэйшы інспектар юрыдычнага сектара Магілёўскага райвыканкама Вольга Дземянкова, расказала пра асноўныя змены ў праекце Канстытуцыі, намеснік начальніка аддзела эканомікі Магілёўскага райвыканкама Алена Судянкова, якая паведаміла аб актуальных паказчыках у сацыяльна-эканамічным развіцці раёна за мінулы год, прадстаўнікі мясцовага дэпутацкага карпуса, якія далі інфармацыю аб праведзенай сельвыканкамамі працы.
Выступаючы перад прысутнымі, Сяргей Ярошчанка закрануў найбольш актуальныя моманты ў праекце Асноўнага Закона краіны, у ліку якіх - захаванне гістарычнай памяці, роля Усебеларускага народнага сходу, сацыяльныя гарантыі.
Змяняецца час, мяняюцца пакаленні і, адпаведна, павінна мяняцца і Канстытуцыя - гэта галоўнае, што неабходна ўсвядоміць кожнаму жыхару краіны.
Старшыня раённага Савета дэпутатаў заклікаў прысутных не быць пабочнымі назіральнікамі, праяўляць актыўнасць і прыняць удзел у будучым рэферэндуме, выканаўшы свой грамадзянскі абавязак.
Таццяна АРХІПАВА.
Фота аўтара і Юліі МАРКОВІЧ.