Сустрэча старшыні аблвыканкама Анатоля Ісачэнкі з актывам Магілёўскага раёна па пытаннях падрыхтоўкі і правядзення рэферэндуму адбылася 14 лютага. У ёй таксама прынялі ўдзел памочнік Прэзідэнта Рэспублікі Беларусь - інспектар па Магілёўскай вобласці Леанід Мартынюк, дэпутат Палаты прадстаўнікоў Нацыянальнага сходу Ігар Марзалюк, старшыня Магілёўскага райвыканкама Алег Чыкіда, начальнік галоўнага ўпраўлення ідэалагічнай работы і па справах моладзі Магаблвыканкама Кацярына Музычэнка.

«Такая сустрэча прадыктавана важнасцю задачы, якая стаіць перад усімі намі – падрыхтоўкі і правядзення рэферэндуму, – адзначыў губернатар Анатоль Ісачэнка. - Папярэдні Год народнага адзінства паказаў усяму свету згуртаванасць і стойкасць беларусаў, перш за ўсё, звязаных у барацьбе з каранавірусам, супрацьдзеянні санкцыям, пераадоленню міграцыйнага крызісу. Сённяшнія ўмовы ўжо прымушаюць нас быць яшчэ больш гнуткімі, каб выбудоўваць доўгатэрміновыя механізмы захавання міру ў нашай краіне, фармаваць новыя кропкі росту ў эканоміцы, а не толькі адаптавацца да змен, якія адбываюцца. Для гэтага мы падышлі да важнейшага перыяду нашай сучаснай гісторыі - абнаўлення палітычнай сістэмы, новага ўзроўню ўзаемадзеяння дзяржавы і грамадства.

Прыемна адзначыць, што дыялог з грамадскасцю ідзе вельмі актыўна. Наведваючы рэгіёны нашай вобласці, заўважаю, людзі праяўляюць высокую цікавасць да Канстытуцыйнага рэфармавання, задаюць шмат пытанняў».

Гаворачы пра найважнейшыя дасягненні сацыяльна-эканамічнага развіцця Беларусі за гады незалежнасці, Анатоль Ісачэнка спыніўся, у прыватнасці, і на развіцці сацыяльнай і вытворчай сферы Магілёўскага раёна ў апошні час:

«У сельскай гаспадарцы будуюцца і мадэрнізуюцца аб'екты і памяшканні, завершана рэканструкцыя ўчастка трасы Магілёў - Чэрыкаў - Касцюковічы, пабудаваны станцыі абезжалезвання вады, зроблена прыбудова на 70 месцаў да дзіцячага сада ў аграгарадку Усход, набыты школьныя аўтобусы, выкананы капітальны рамонт дзевяці жылых дамоў і г.д.

Зразумела, што з павышэннем узроўню жыцця чалавеку хочацца большага. У раёне ёсць шэраг сацыяльна-значных пытанняў, якія трэба аператыўна вырашаць: гэта рамонт і падтрыманне дарожнага фонду, працяг рамонту жылфонду, будаўніцтва сетак водазабеспячэння ў вёсках і пасёлках, будаўніцтва інжынерна-транспартнай інфраструктуры. У СЭЗ існуе неабходнасць стварыць станцыю па маніторынгу навакольнага асяроддзя, якая дазваляе людзям адсочваць абстаноўку. Мы ведаем пра гэтыя праблемы, але ніхто не прыйдзе і за нас іх не вырашыць. Каб рэалізоўваць сацыяльную палітыку, нам патрэбна моцная эканоміка, якая не зможа працаваць без стабільнай дзяржавы. А ў аснове гэтай стабільнасці знаходзіцца наша Канстытуцыя, якая захоўвае суверэнітэт і дае права кожнаму чалавеку на самавызначэнне».

Анатоль Ісачэнка адзначыў, што за чвэрць стагоддзя эканоміка моцна змянілася, з'явіліся новыя яе галіны, пашыраецца IT-кірунак, пабудавана атамная станцыя, развіваецца аўтамабілебудаванне. Гаворка ідзе аб пераходзе ад індустрыяльнага да постіндустрыяльнага інфармацыйнага грамадства. І змены працягваюцца.

Таксама ён надаў увагу і Году гістарычнай памяці, падкрэсліўшы, што для беларусаў вельмі важна захаваць гістарычную памяць, надаўшы ёй канстытуцыйны статус. Даў старшыня аблвыканкама і тлумачэнні па праекце Асноўнага закону.

Працягнулася сустрэча ў фармаце дыялогу. З залы актыўна паступалі пытанні, а таксама прапановы і словы падзякі. Так, дырэктар Магілёўскай раённай дзіцячай школы мастацтваў ім. Л.Л.Іванова Ала Лапкіна пацікавілася, якія праблемы найбольш часта агучваюць людзі падчас такіх сустрэч, што аднолькава хвалюе і гарадскога, і сельскага жыхара, работніка вытворчасці і сацыяльнай сферы. На што Ігар Марзалюк адказаў, што самае галоўнае, што аб'ядноўвае ўсіх, хто задаваў пытанні - гэта жаданне захаваць свой нацыянальны дом, мір у гэтым доме і гарантаваную магчымасць годна развівацца.

«Калі казаць персаніфікавана, то найбольшыя абмеркаванні закранулі артыкул пра неабходнасць клапаціцца пра сваё здароўе. У выніку ён бы ў адрэдагаваны, і з яго знік імператыўны пасыл», - адзначыў Ігар Аляксандравіч. - Парадавала, што людзі не аднойчы ў розных месцах узнімалі тэму і нават выказвалі гатоўнасць адлічваць сродкі на дарагія аперацыі дзецям, якія маюць у гэтым патрэбу. Шмат пытанняў задавалі па гісторыі і гістарычнай памяці. Наогул, вельмі прыемна, што людзі сапраўды ўважліва вывучаюць праект, праяўляюць увагу да дэталяў. Яны абмяркоўваюць і спрачаюцца – мы бачым каласальную цікавасць да гэтай кампаніі, неабыякавасць людзей да сваёй краіны».

Старшыня раённага Савета ветэранаў Віктар Пінчук распавёў пра тое, што ў раёне налічваецца больш за 8,5 тыс. ветэранаў і яны заўсёды з'яўляліся і працягваюць з'яўляцца актыўнымі ўдзельнікамі грамадска-палітычных мерапрыемстваў. Таксама ён адзначыў, што задачай ветэранскага руху з'яўляецца не толькі выхаванне падрастаючага пакалення, але і ўвекавечанне памяці як ветэранаў вайны, так і ветэранаў працы.

«Летась у Магілёўскім раёне была створана кніга, у якой сабраны біяграфіі больш за 600 землякоў, узнагароджаных дзяржузнагародамі за добрасумленную працу. Акрамя таго, ушанавана памяць 19 заслужаных людзей рэгіёна. І ў сувязі з гэтым, ёсць неабходнасць на заканадаўчым узроўні разгледзець магчымасць спрасціць працэдуру атрымання дазволу на размяшчэнне, да прыкладу, мемарыяльнай дошкі на фасадзе ўстаноў, якія не з'яўляюцца гісторыка-культурнай каштоўнасцю», - пазначыў сваю прапанову Віктар Пінчук.

Спікеры пагадзіліся, што ў некаторых выпадках, сапраўды, мае сэнс гэту працэдуру зрабіць прасцей.

У сваю чаргу, настаўнік гісторыі Пашкоўскага КПК ДС-БШ Ірына Краўчанка падзялілася меркаваннем, што артыкул 15 праекта змяненняў і дапаўненняў Канстытуцыі Рэспублікі Беларусь аб захаванні гістарычнай праўды і памяці аб гераічным подзвігу беларускага народа ў гады Вялікай Айчыннай вайны знайшоў водгук у сэрцы кожнага беларуса яшчэ на этапе абмеркаванняў. І пацікавілася, які мяркуецца механізм рэалізацыі гэтых канстытуцыйных норм.

Ігар Марзалюк адказаў, што на сёння ўжо ёсць два мемарыяльныя законы аб генацыдзе беларускага народа і недапушчэнні папулярызацыі нацызму:

«Акрамя гэтага, плануецца ўнясенне пэўных карэктываў у падручнікі і навучальныя дапаможнікі, такія карэктывы ўжо ўнесены ў новы падручнік па гісторыі для 11 класа. Гэта змена сацыяльна-гуманітарнага блока для вышэйшых і сярэдне-спецыяльных навучальных устаноў. І гэта ўнясенне карэктыў у тую канцэптуалістыку і ў тыя праграмы, як сярэдняй, так і вышэйшай школы, дзе будуць прапісаны асноўныя моманты, звязаныя з вывучэннем гісторыі Вялікай Айчыннай вайны і перыяду акупацыі нашай краіны. У першую чаргу, гэта тычыцца тых тэм, якіх раней, магчыма, свядома пазбягалі - звязаныя з калабарацыяй, спецыфікай акупацыйнага рэжыму. Глыбіня гістарычнай памяці павінна быць вялікая, тады і ў нашых дзяцей не будзе ўзнікаць жадання апранаць чужую сімволіку і «зігаваць» на плошчах».

Начальнік бройлернага цэха ЗАТ «Сервалюкс» Сяргей Валчкоў выказаўся ў падтрымку дапаўнення ў артыкул 32 аб адказнасці бацькоў за выхаванне дзяцей, аб тым, што неабходна рыхтаваць іх да грамадска-карыснай працы, прывіваць культуру і павагу да законаў, гістарычных і нацыянальных традыцый краіны. І прапанаваў часцей наведваць памятныя мясціны як навучэнцам, так і работнікам арганізацый і прадпрыемстваў, незалежна ад формы ўласнасці. Адзначыўшы, што на асабістым досведзе ведае, што пасля наведвання падобных месцаў людзі даведаюцца вельмі шмат новага і застаюцца пад уражаннем.

«Я даўно закранаў гэту тэму і хачу адзначыць, што лёд крануўся. У нас будуць арганізоўвацца такія экскурсіі, гэта абмяркоўваецца ў Міністэрстве адукацыі, - пракаментаваў Ігар Марзалюк. - Ужо ствараецца сетка ваенна-патрыятычных клубаў. Лічу, што нейкі ўсенавуч для розных узроставых груп будзе карысны.

Зацверджана праграма аб патрыятычным выхаванні насельніцтва Беларусі. Гэта адносіцца не толькі да дзяцей, а да ўсіх нас. Мы павінны валодаць элементарнымі ведамі аб саміх сабе, аб сваёй гісторыі. Выхоўваць трэба пачынаць праз гісторыю сваёй сям'і, свайго мікрарэгіёну».

Кацярына Музычэнка дапоўніла, што па распараджэнні старшыні аблвыканкама распрацаваны дарожная карта, праграма абласных мерапрыемстваў да Года гістарычнай памяці, куды ўцягнуты ўсе пласты насельніцтва, пачынаючы ад дзяцей, заканчваючы бацькамі.

Намеснік дырэктара Межысецкай сярэдняй школы Андрэй Трэй выказаўся пра артыкул 321, які яго зацікавіў, аб падтрымцы моладзі дзяржавай, пра тое, што сёння ў Магілёўскім раёне, як і рэспубліцы ў цэлым, для маладых людзей створаны ўсе ўмовы, каб праявіць сябе. І пацікавіўся ў старшыні аблвыканкама Анатоля Ісачэнкі, якія напрамкі маладзёжнай палітыкі бачацца ў прыярытэце, і якіх жыццёвых прынцыпаў прытрымліваецца ён асабіста ў зносінах з моладдзю.

«Нам патрэбна маладзёжная палітыка. Моладзь сёння прагрэсіўная, крэатыўная, яна іншая - і гэта правільна. Новы віток грамадства, рух наперад стварае новыя пытанні і запатрабаванні. Але ў аснове любой дзяржаўнасці - заўсёды моладзь. Можна шмат разважаць, але самае важнае - гэта выхаванне падрастаючага пакалення ў любові да сям'і, навакольных, сваёй хаты, вуліцы, горада, краіны. Вакол гэтага будуецца і выхаванне, і адукацыя. Адсюль пачынаецца далейшае развіццё. Трэба ўмець чуць моладзь, разумець і дапамагаць ёй, - выказаў меркаванне Анатоль Ісачэнка. - А што да прынцыпаў у зносінах з моладдзю, самае галоўнае - быць з ёй сумленным, заўсёды казаць праўду. Моладзь адчувае фальш, як ніхто. Толькі ў адкрытых зносінах атрымліваецца нармальны дыялог і вынік. У нас добрая моладзь, якая любіць сваю краіну і ганарыцца ёй».

Са словамі падзякі да прэзідыума звярнулася дырэктар Дашкоўскай сярэдняй школы Крысціна Банадысева. Яна адзначыла, што прадстаўнікамі дзяржструктур і дэпутацкага корпуса праведзена вялікая работа па інфармаванні насельніцтва аб змяненнях, якія ўносяцца ў праект Канстытуцыі, што вельмі важным момантам стала магчымасць кожнаму жадаючаму ўнесці свае прапановы. І выказала ўпэўненасць, што грамадства сёння гатова прыйсці на рэферэндум і аддаць свой голас за мір, згоду і годную будучыню.

«Людзі, сапраўды, задавалі і задаюць вельмі шмат пытанняў, уважліва вывучаючы праект абноўленай Канстытуцыі. І гэта правільна, таму што нам з вамі жыць па ёй найбліжэйшыя дзесяцігоддзі.

Дзякуючы кожнаму, хто выказвае сваё меркаванне, задае пытанні, дзеліцца развагамі, уносіць прапановы», - падвёў вынік сустрэчы Анатоль Ісачэнка.

Крыніца: mogilev-region.gov.by