У студэнцкіх аўдыторыях зараз горача — ідзе размеркаванне, і кожны, вядома ж, хоча, каб першае працоўнае месца не аказалася першым бліном, каб першыя два гады заклалі надзейную аснову для прывабнасці будучых рэзюмэ. І калі сённяшнім выпускнікам гэта толькі трэба, то тыя юнакі, якія ВНУ скончылі летась, ужо паўгода як у прафесіі. Аб першых кроках у ёй, поспехах, адаптацыі да мясцовых умоў мы вырашылі спытаць у маладых спецыялістаў, якія размеркаваліся ў Магілёўскі раён. Усяго іх 150. Пагутарылі з самымі амбіцыйнымі.

Пасля заканчэння Беларускай сельскагаспадарчай акадэміі Анатоль Елтышаў працуе заатэхнікам па птушкагадоўлі на ВТУП «Птушкафабрыка «Ялец». У маладога чалавека мэтавае накіраванне з Магілёўскага райвыканкама, хаця родам ён з Касцюковіцкага раёна. 

— Усвядомлена браў мэтавае, каб працаваць менавіта на птушкафабрыцы — месца прэстыжнае і з прафесійнага пункту гледжання цікавае, — кажа ён. - З самага дзяцінства даглядаў хатнюю птушку, люблю жывёл, таму выбар прафесіі глыбока ўсвядомлены. Задавальняе ўсё: адносіны з калегамі, якія заўсёды гатовы дапамагчы, графік работы. Прыемная нечаканасць - кватэра, якую вылучыла прадпрыемства. 

Цікава, што Анатоль сур'ёзна захапляецца пчалярствам. У яго 23 пчаласем'і, і ён заве сябе «пчаляр выходнага дня».

У раёне для павышэння прафесійнага майстэрства і прэстыжу статусу выпускнікоў пяты год праводзіцца конкурс «Лепшы малады спецыяліст». Выбраць пераможцу заўсёды цяжка, бо таленавітай моладзі шмат, аднак бухгалтар з Магілёўскага райспажыўтаварыства Крысціна Купрэева здолела заняць першае месца.

Любоў да прафесіі дзяўчыне прывіла яе бабуля, якая шмат гадоў прапрацавала ў гэтай сферы. І па шчаслівай выпадковасці бабулін прыклад і прафесійны вопыт, пра які Крысціна гаворыць з асаблівым трапятаннем, супаў з уласнымі перавагамі маладога спецыяліста.