Магілёўскі аблвыканкам павялічвае сродкі, што накіроўваюцца на падтрымку малога і сярэдняга бізнесу. Пра гэта заявіў намеснік старшыні Магілёўскага аблвыканкама Руслан Страхар падчас нарады з банкамі рэгіёна па пытанні аказання дзяржаўнай фінансавай падтрымкі за кошт сродкаў абласнога бюджэту суб’ектам малога прадпрымальніцтва, якія рэалізуюць інвестыцыйныя праекты на падставе Указа Прэзідэнта Рэспублікі Беларусь ад 29 мая 2009 г. № 255.

Як растлумачыў Руслан Страхар, абласны выканаўчы камітэт павялічвае сродкі на кампенсацыю банкаўскіх працэнтаў па крэдытах. Такім чынам, прадпрымальнік атрымлівае крэдыт па льготнай стаўцы. А на ўвесь тэрмін абслугоўвання крэдыту аблвыканкам кампенсуе частку працэнтнай стаўкі. У сваю чаргу прадпрымальнік развівае бізнес і самае важнае – стварае новыя працоўныя месцы.

Што тычыцца кампенсацыі банкаўскіх працэнтаў па крэдытах, то тут праца будзе праводзіцца па дзвюх схемах. Першая – прадпрымальнік звяртаецца ў банк-партнёр, атрымлівае камерцыйны крэдыт, аблвыканкам кампенсуе паўстаўкі рэфінансавання на ўвесь тэрмін пагашэння гэтага крэдыту. Другая схема – аблвыканкам размяшчае сродкі ў дэпазіты, банкі-партнёры выдаюць крэдыт адразу пад меншы працэнт.

«Магілёўскім аблвыканкамам праводзіцца пастаянная праца па падтрымцы прадпрымальніцтва ў межах дзяржаўнай праграмы па развіцці і падтрымцы прадпрымальніцтва па розных напрамках, – расказаў Руслан Страхар. – Сярод папулярных – функцыянаванне і развіццё цэнтраў падтрымкі прадпрымальніцтва, якія арганізуюць працу па інфармаванні, навучанні і перанавучанні прадпрымальнікаў. Акрамя таго, у адпаведнасці з дзяржаўнай праграмай, на сённяшні дзень у нас ёсць магчымасць аказваць рэальную падтрымку ў выглядзе кампенсацыі працэнтаў за карыстанне крэдытнымі рэсурсамі».

Дарэчы, апошнія некалькі гадоў з улікам пэўных абмежаванняў (кавідных або санкцыйных) аблвыканкам аказваў падтрымку ў межах наяўных магчымасцяў. Сёлета старшыня аблвыканкама Анатоль Ісачанка прыняў рашэнне ўзмацніць гэту падтрымку.

Менавіта таму, перш за ўсё, істотна актывізуецца інфармацыйная праца як з бізнес-супольнасцю рэгіёна, так і з банкамі-партнёрамі РБ, якія займаюцца крэдытаваннем малога і сярэдняга бізнесу.

«Мы гатовы ўзмацняць гэту працу, накіроўваць дадатковыя рэсурсы на кампенсацыю працэнтаў суб’ектам малога бізнесу на рэалізацыю праектаў, – падкрэсліў Руслан Страхар. – Гэта могуць быць любыя капітальныя выдаткі ад прадпрымальнікаў, нацэленыя на стварэнне новых працоўных месцаў. Сярод іх – купля нерухомасці, набыццё абсталявання, транспартных сродкаў».

Яшчэ адна галоўная мэта на сённяшні дзень, па словах намесніка старшыні аблвыканкама, – заклікаць малы і сярэдні бізнес прыносіць новыя прапановы для разгляду: «Сёння мы яшчэ раз звяртаемся да бізнесу: прыносьце новыя праекты. Мы гатовы разглядаць прапановы і дапамагаць рэалізоўваць ініцыятывы».

З прапановамі можна звяртацца ў адміністрацыі або ўпраўленні і аддзелы эканомікі сваіх гарадоў і раёнаў ці ў камітэт эканомікі Магілёўскага аблвыканкама.

Галіна Гаўрыловіч, фота аўтара