Беларусь і Манголія зацікаўлены супрацоўнічаць у прыродаахоўнай сферы, паведамілі БЕЛТА ў прэс-службе Мінпрыроды.

У рамках дзяржаўнага візіту ў Манголію міністр прыродных рэсурсаў і аховы навакольнага асяроддзя Сяргей Масляк і міністр навакольнага асяроддзя і турызму Манголіі Бат-Эрдэнэ Бат-Улзій правялі сустрэчу і перагаворы. У ходзе сустрэч былі абмеркаваны пытанні ўзаемадзеяння паміж прыродаахоўнымі ведамствамі Беларусі і Манголіі. Абодва міністры адзначылі зацікаўленасць у абмене вопытам па такіх напрамках, як зялёная эканоміка, максімальнае выкарыстанне адходаў шляхам іх уключэння ў гаспадарчы абарот, захаванне ландшафтнага і біялагічнага багацця, разведка і здабыча карысных выкапняў і іншыя.

Сяргей Масляк падзякаваў кіраўніку мангольскага прыродаахоўнага ведамства за гасціннасць і запрасіў наведаць Беларусь для далейшага ўмацавання ўзаемадзеяння паміж краінамі.

"У час перагавораў кіраўнікі прыродаахоўных ведамстваў Беларусі і Манголіі таксама абмеркавалі пытанні навуковага супрацоўніцтва. У прыватнасці, Сяргей Масляк нагадаў, што раней у інтарэсах мангольскага боку ў рамках дагавора з Беларускім рэспубліканскім фондам фундаментальных даследаванняў была выканана навукова-даследчая работа на тэму "Гумінавыя прэпараты на аснове торфу, вугалю для зялёнага добраўпарадкавання пустынных тэрыторый, аховы навакольнага асяроддзя". Мэта работы заключалася ў тэарэтычным і эксперыментальным абгрунтаванні саставу гумінавых прэпаратаў як прыродных злучэнняў для зялёнага добраўпарадкавання пустынных тэрыторый Манголіі", - расказалі ў Мінпрыроды.

Кіраўнік беларускага прыродаахоўнага ведамства перадаў мангольскаму калегу справаздачу, у якой змешчаны тэарэтычныя рэзультаты работы, у тым ліку папярэдні асартымент драўняных раслін, устойлівых да дэфіцыту вільгаці, засалення глебы і іншых неспрыяльных глебава-кліматычных умоў, набліжаных да ўмоў Манголіі. Практычна частка названай работы так і не была рэалізавана. Сяргей Масляк прапанаваў прадоўжыць работу ў гэтым напрамку, распрацаваны асартымент соле- і засухаўстойлівых раслін варта выпрабаваць непасрэдна ў канкрэтных прыродна-кліматычных умовах рэгіёнаў Манголіі.

БелТА